RTR, Per dapli famiglias cun uffants

Publicaziun: 29-05-2013, 08.47 / www.rtr.ch


Trun duess daventar in dals pli attractivs vitgs en Surselva. Questa finamira ha la gruppa "Interess Trun". La gruppa fa quitads, perquai ch'i dat pli e pli paucas naschientschas en vischnanca. Perquai vul ella carmalar natiers famiglias giuvnas cun uffants. Ier saira ha "Interess Trun" preschentà ils dus projects: “La tgira d'uffants” ed il project “architectura”.

Tgira d'uffants vul dir ch'ils uffants da la scolina fin a la 9. classa pon vegnir survegliads da la damaun fin la saira. Da mezdi datti in maisa da gentar. Sch'ils geniturs giavischan pon ils uffants er vegnir survegliads la saira e la fin d'emna. Uschia pon ils geniturs ir omadus a lavurar.

Cun il project architectura vul ins realisar abitaziuns modernas per famiglias. La suprastanza communala beneventa quests dus projects, sco il president communal Donat Nay ha ditg.

Part da la gruppa "Interess Trun" fan Martin Tomaschett, Pieder Decurtins ed Anita Alig. (rtr/ec)



Emissiun: Trun vul daventar la vischnanca la pli attractiva da la Surselva (29-05-2013)



>> http://www.rtr.ch/home/novitads/archiv/2013/05/29/Dapli-famiglias-cun-uffants.html