Trun oz

Ina buna infrastructura …

Trun ha aunc ina fetg buna infrastructura per tut quei ch'ei drova e pretenda d'in center da viver
per la populaziun en tuttas vegliadetgnas.

Trun porscha biars e differents negozis sco il Volg, in mazler, ina cascharia, in calger, ina stizun dil pasterner, ina stampa, ina stizun da sport alpin, ina fatschenta da computers, coiffeusas, garaschas d'autos cun tancadi, bancas e miedis. Trun ha ina moderna infrastructura da scola. La buna e varionta gastronomia da Trun ei enconuschenta. Il traffic public sco il tren ed igl auto da posta han lur staziuns pli u meins enamiez il vitg. Per il traffic privat ein las vias era bein carrablas igl unviern adina senza prighel.

Trun ha aunc bia dapli: A Trun dat ei biaras e multifaras uniuns che porschan activitads culturalas
e sportivas sin ault nivel.

Trun ei enconuschent per il cant, la musica ed igl art da tuttas sorts. Il Museum Sursilvan Cuort Ligia Grischa muossa ovras dad Aluis Carigiet, Mathias Spescha ed auters artists, era contemporans. La „Senda d'art“ ei reha cun sculpturas pintgas e monumentalas da differents artists.

Medemamein enconuschent ei a Trun la zun vasta purschida sportiva la stad sco igl unviern. Naven dalla loipa da cuorsa liunga sur il tennis e ballapei, hockey sil glatssch ed in runal da skis entochen il cavalcar e sittar dat ei aunc ulteriuras pusseivladads da sedivertir el temps liber per giuven e vegl.

Cun tut quei porscha Trun ina fetg buna infrastructura sco center da viver per tuttas generaziuns.

Tut quei tuna bein - aunc!

… denton la digren dalla populaziun periclitescha la veta dil vitg
Trun ha - sco era biars auters loghens decentralisai en Svizra - in problem demografic. Il pievel vegn pli vegls. Pli e pli biars giuvenils ston ir anoragiu per lavur. Quei munta era che las naschientschas el vitg sesminueschan. Sche quei svilup secuntinuescha ein nossas infrastructuras dil vitg periclitadas en entgins onns. Senza ina buna infrastructura ei Trun buca pli attractivs per giuvnas famiglias e la digren dalla populaziun cuntinuescha aunc pli spert. Lu savess ei schabegiar tgunschamein che pliras da quellas necessitads per viver el vitg vegnan serradas per adina. Era allas numerusas uniuns culturalas e sportivas, ch'ein oz fetg fermas, vegnan ils commembers a muncar. Gia naven da 2013/2014 sa la qualitad da scola mo pli vegnir salvada cun cooperaziuns intercommunalas.
L'evidenta digren dalla populaziun ha era per consequenza che pli e pli biaras casas ni habitaziuns vegnan vitas e correspundan gleiti buca pli als basegns da giuvnas famiglias. Aschia spiarda il vitg era attractivs habitadis per gest quella glieud che mantenessen il vitg sin liunga vesta: las famiglias.

Svilup dalla populaziun a Trun dapi 2001:

Habitonts Trun e Schlans

Naschientschas a Trun

Naschientschas e Mortoris Trun

Scolars ella superiura Trun/Sumvitg

Conclusiun: fatalitad en otg onns:

Sche quei svilup secuntinuescha sin tala moda, discurrin nus en 8 onns aunc ina gada sur da cooperaziuns da scola! La scola superiura vegn lu segiramein „exportada“ si Mustér ni giu Glion. Sil pli tard lu sedamondan pliras famiglias, schebein ellas dueigien veramein secasar a Trun, nua ch'ils affons ston ir pli lunsch a scola. Quei fuss ina raschun dapli da buca vegnir a Trun cun famiglia. Aschia vegn la digren aunc pli spert ed ei la fin finala fatala per tut quei che fa Trun atractiv ozildi.

Trun astga e sa buca spetgar pli ditg!